The Groovy Four taldea honako hauek osatzen dute: Martin Burguez (ahotsa eta gitarra), Arnaud Desprez (saxofoia), Oriol Fontanals (kontrabaxua) eta Pascal Mucci (bateria). "Lau musikari horiek urteetako ibilbidea dute Europako agertokietan, eta euren arteko konplizitatea lehen notatik nabaritzen da".
Europako biraren azken geldialdietako bat izango da Arrasatekoa. Bira horretan, Frantziako hainbat hiritan aritu dira, besteak beste, Parisen. Aterpekoaren ondoren, taldeak Bartzelonara joko du kontzertu-bira itxiz eta Take a Walk with The Groovy Four albuma aurkeztuz. "Diskoak konposizio propioak eta kontu handiz aukeratutako bertsioak uztartzen ditu, bere estiloa ezin hobeki islatuz: soinu garbia, dantzagarria, erritmoz betea eta blues klasikoenaren xarma bereziarekin".
Kontzertua sarrera librekoa izango da, edukiera bete arte, eta Arrasate Bluesek eta Aterpe tabernak tokiko musika-eszena bizirik mantentzeko helburuarekin bultzatzen duten programazioaren barruan sartzen da.