Aurreko ikuskizunekin alderatuz, ezberdina izango da Arrasateko elkarteak aurten eskainiko duena; izan ere, obra zehatz bat beharrean, ibilbidean zehar egin dituzten zarzuelen laburpena edo gainbegiratua egingo dute oraingoan. "Emanaldiaren ildo nagusia abesbatzak antzeztuko dituen hainbat zarzuelatako zortzi abesti izango dira; esaterako, Baserria, La leyenda del beso, Katiuska eta Gigantes y cabezudos zarzuelatako abestiak izango dira, eta baita oraingoz aireratuko ez ditugun beste hainbat ere. Abestien tartean aurkezpen txiki batzuk egongo dira eta pantaila baten gure ibilbidearen irudi batzuk erakutsiko ditugu. Gure helburua da gurekin bidean egon diren guztiei eskerrak ematea eta omentzea", azaldu du Izaskun Murgia elkarte lirikoko eszena-zuzendari Mertxe Salaberrik.
Sarrerak salgai, azaroaren 3an hasita
Azaroaren 28an, 29an eta 30ean izango dira, ohi bezala, Amaia antzokian emanaldiak; sarrerak salgai daude, leihatilan, 20 eurotan, eta bihar, hilak 4, jarriko dituzte salgai Arrasate.eus atarian, 08:00etan.
Iazko urtarrilean egin zuten Antologia emanaldiko une bat. Argazkia: M. S.