Nortasun Agiria edota pasaportea Arrasaten tramitatu ahal izango da azaroaren 18an. "Estatuko Gobernuaren Ordezkariordetzak martxan jarritako administrazio-izapiderako unitate mugikorrean egingo dituzte tramitazioak", diote udal ordezkariek.
Unitate mugikorra 09:30etik 13:00etara egongo da zabalik egun horretan, eta dagoeneko hartu daiteke hitzordua, BAZeko bulegoetan edota esteka honetan, azaroaren 15era arte. "Hara joaten denak hainbat dokumentu eraman beharko ditu, hiriburuetako Polizia Nazionaleko egoitzetan bezala".
Gobernu Ordezkariordetzak jakinarazi duenez, "bereziki garrantzitsua" da tramitearen kostua eskudirutan eramatea, "izan ere, unitate mugikorrek ez dute txartel bidez ordaintzeko sistemarik".
Oraingoz, egun bakarra
Azaroaren 18ko hitzordua bakarrik baieztatu dute, momentuz. Eskaera handia bada, ordea, hitzordu berriak ezartzeko konpromisoa agertu dute. "Herritarrek hiriburuetara desplazamenduak egitea ekidin nahi dugu modu honetan, herritarrei bizitza erraztu, herrian tramite administratibo hauek eginez", azaldu du Maider Morras alkateak.
Halako tramiteak egiteko bulego eta ordezkaritzak eskualdean izatea "aldarrikapen historikoa" dela azpimarratu du alkateak. "Horrela berretsi zigun Arrasateko Nagusien Kontseiluak, besteak beste".