Urriko osoko bilkuran, EAJk eta PSE-EEk patineteen ordenantzari buruz galdetu ostean, Garazi Etxeberria Hirigintza Trantsizio ekologiko eta Mugikortasun zinegotziak aurreratu zuen zirkulazio ordenantza berria idazten ari dela Udal Gobernua. "Alde batetik, indarrean dagoena 2014koa delako eta zaharkitua dagoelako; eta, bestetik, apirilean onartu zen Mugikortasun Planak hala jasotzen duelako. Helburua da ibilgailu guztiak arautuko dituen ordenantza izatea", azaldu du zinegotziak.
Gaineratu duenez, egun indarrean dagoen ordenantzak ez ditu jasotzen mugikortasun pertsonaleko ibilgailuak, abiadura orokorrak eta antzeko gai batzuk. Hori dela eta, eguneratzen ari dira, "egungo errealitate sozial eta juridikora egokitutako araudia" lortzeko asmoz. "Arautuko diren ibilgailu pertsonalen artean daude autoak, motorrak, bizikletak, patinete elektrikoak eta mugikortasunarekin zerikusia duten ibilgailu guztiak".
Martxan jarri duten kontsulta publikoaren bidez, herritar, elkarte eta erakundeen ekarpen eta iritziak jaso nahi ditu Gobernuak, arau berriak "eragina izan dezakeen eremu guztietan ikuspegi zabal eta parte-hartzailea" bermatzeko. "Udal teknikarien profesionaltasunak teknikoki ikuspegi zabala bermatuko badu ere, herritarren egunerokoari lotutakoak entzun nahi ditugu, ordenantza osatu bat izan dadin, herritarren beharretara egokitutakoa", dio Etxeberriak.
Herritarrek azaroaren 17ra arte egin ditzakete ekarpenak, hemen.