Europako Ondarearen Jardunaldiak egingo dira Arrasaten datorren astean, eta, horren harira, 2017tik gaur arte Arrasate Zientzia Elkartekoek ohikoak ez diren bisita gidatuak egin izan dituzte Arrasate ezagutzera emateko. Hala, urriaren 18an, Arrasateko industria arkitektura bisita egingo dute.
Bisitaren ibilbidea
Bisita komentatuan ezagutarazi nahi dute zer galdu den Arrasaten eta zer geratzen den, honako ibilbidea eginda: "Bilgunea Etxaluze alboko Cerrajerako aterpea izango da. Lehenengo azalpenak bertan emango ditugu, eta, Erlojuaren eraikinera joango gara. Bertan, Cerrajera zer zen, XX. industrializazioa zer izan zen, enpresa enblematikoa izan zen, eta lan asko eman zuen; desagertuta asko dago izan zenetik eta tablet-ean erakusteko argazki batzuk eramango ditugu. Gero, hiltegia izan zen lekura joango gara; industriala agian ez da, baina, zerbait bazen. Eta gero, desagertutako beste eraikin bat da guk Kutxareria deitzen dioguna, Industria Mondragonesa zena, gero saldu zena; eraikin bikaina zen eta eraikin hori ere bota zen. Bukatu, berriz, Elman egingo dugu, bisitari amaiera emanez", adierazi du Ana Ugaldek, Arrasate Zientzia Elkarteko kideak.
Bisitara joan nahi duenak 943 25 20 21 telefonora deitu edo kultura@arrasate.eus helbidera idatzi beharko du izena emateko. Bisita, doakoa izango da.