Maritxu egunerako astebeteren falta, motorrak berotzen hasi da Komisiñua. Herriko Plazara gerturatu diren herritarrak ardo edan eta gazta jatera gonbidatu dituzte, herriko eragile bati Inbutu preziatua eman aurretik. Kooltur Ekintzak izan da aurtengo aitortza berezia jaso duena. "Egia esan, ez genuen inondik inora espero; baina, biziki eskertzen dugu eta oso pozik gaude", esan du taldeko kide Iker Barandiaranek.
Maritxu Kajoi Komisiñuak loreak bota dizkio taldeari. "15 urte pasa dira lehenengo kontzertu hartatik. Gari lehenengo akorde haiek jotzen ziharduela jaiotzen zegoen egiteko modu bat. Modu hori ez dago modan eta ez da ohikoa. Guk ez dugu San Mames bitan beteko eta ez dugu reel biralena sortuko. Arrasatearrok argi ikusi dugu 2010etik kulturan gozamenerako leiho bat eskaini duzu, sold-out eta plataformetako erreprodukzioen gainetik, kultura behar den moduan zabalduz", esan diete.