Hainbat eragiletako ordezkariek osatzen dute Arrasateko Hezkuntza Kontseilua: Leintz Eskola Kirola, Txatxilipurdi, Institutuko guraso batzordea, Institutuko zuzendaria, Arizmendi Ikastolako zuzendaria, Arizmendi Ikastolako guraso batzordea, Arrasate Herri Eskolako Guraso Elkartea, Arrasate Herri Eskolako zuzendaria, Haur eta Guraso Asanblada, Arrasate Musikal, Udal Euskaltegia, Udaleko Hezkuntza teknikaria, Elhuyarreko bideratzaileak eta Udaleko Hezkuntza eta Ongizate zinegotzia.
Ikasturte honetan plan estrategikoari helduko dio kontseiluak, "lehentasunezkotzat" hartuta herri hezitzaile filosofia. "Lan horretan, lehen urratsak ematea espero du dugu, eta 2015ean bertan behera utzi zen Arrasatek Hezi proiektuaren arima berreskuratzen joatea".
Hiru arlo nagusi
Arrasateko Hezkuntza Diagnosia aurkeztu zuen Udalak, ikastetxeetako zuzendariekin batera, martxoan. Hiru arlo nagusi jarri zituzten erdigunean lanketa abiatzeko: euskara, inklusioa eta bizikidetza eta herri kohesioa.
Prozesu horren hurrengo urratsak erronka bakoitzari erantzuteko ekintza zehatzak irudikatzea izango dira. Horretarako, hezkuntza eragileek lau ardatz nagusiren gainean hausnartu dute: "Helmuga, lau urte barru non egon nahi dugun; urratsak, zein pauso eman behar ditugun; arduradunak, nor izango den pauso horien gidari; eta baliabideak, zer behar dugun".
Hezkuntza komunitario, inklusibo eta berritzailea
Arrasateko Udalaren eta Arrasateko Hezkuntza Kontseiluaren helburua argia da: "Etorkizuneko hezkuntza komunitario, inklusibo eta berritzailea eraikitzea, herritar guztien parte-hartzearekin". Horregatik, datozen hilabeteetan askotariko ekimenak abiaraztea espero dituzte, "herritarren parte-hartzea bultzatuz".