Urteroko bermut politikoarekin hasi dute eguna Irati Topalekuan, eta Sortuko Andoni Olariagak eta Ernai gazte antolakundeko Amaia Arbeok hartu dute hitza Ondo lotutakoak askatzera solasaldian. Txiki eta Otaegiren heriotzaren 50. urteurrenari lotutako ikus-entzunezko batean oinarritutako solasaldia izan da. Bien bitartean, gaztetxoenek ere izan dute gozatzeko aukera; izan ere, Biteri plazan tailerrak eta jolasak antolatu dituzte. Goizeko ekintzak bukatuta, Kulturolako aterpean paella eta saiheski jana egin dute, eta tripa bete ostean, Andoni Ollokiegiren emanaldia izan da protagonista.
Bazkal osteko ekintzak
Ollokiegiren emanaldia bukatuta, Danele Sarriugarte idazleak eta Miren Narbaiza Mice musikariak Kaixo, Karis ikuskizuna egingo dute Iratin, eta egunari bukaera emateko, 22:00etan hasita kontzertuak egongo dira gaztetxean. Malko, Odei eta 721 igoko dira gaztetxeko oholtzara; ostean, DJ saio bat egongo da. Sarrerak gaztetxean egongo dira salgai, 5 eurotan.