Smartlog Ointxe-k emakumezkoen Euskal Kopan jokatuko du aurten ere, eta gaur izango du lehendabiziko finalerdia, 17:30etik aurrera, Barakaldoko taldearen aurka. "Talde bizkaitarrak Challenge ligan jokatu zuen aurreko denboraldian, baina ezin izan zion mailari eutsi. Zalantzarik gabe, igoera lortzeko borrokatu beharreko taldeetako bat da; gaurko partida proba ona izango da Smartlog Ointxe-rentzat", adierazi dute arrasatearrek.
Iraurgik eta Galdakaok jokatuko dute Euskal Kopako beste finalerdia, eta bi irabazleen arteko finala, berriz, domekan jokatuko da, 12:00etan.
Domingos, Angolan
Ointxe-ko zuzendaritzak jakinarazi duenez, Joana Domingos jokalari angolarrak Angolan jarraitzen du, pasaportearekin "arazo burokratikoak" konpontzeko zain. "Lanean ari gara egoera konpontzen laguntzeko, baina orain arte ez dugu arrakastarik izan. Datorren astera arteko epea jarri da, liga ofizialki urriaren 5ean hasten delako, eta ezin da iritsi arte askoz gehiago itxaron".