Musakolako harmailak beteta, txalo artean hartu dituzte bi taldetako jokalariak. Animo artean hasi dute partidua, eta giroa dezente berotu da etxekoen bi golekin. Minutu batean lortu ditu Mondratek bi golak, eta zaleek biziki ospatu dituzte horiek.
Bi goleko abantaila pentsaezina zen, partidua hasi aurretik. Bada, hori kudeatzea egokitu zaio Arkaitz Ribera entrenatzaileari. Eta, etxeko jokalariak ondo lehiatu dira lehen zatian.
Baina, Lauburu Bigarren Mailako taldea da, erritmo azkarrarekin jokatzen du eta jokalari erabakigarriak ditu. Hala, lehen zatiko hamargarren minutua bete orduko, berdintzea lortu du. Are gehiago, penalti bikoitz batekin, aurretik ipini da markagailuan, atsedenaldira heldu aurretik.
Bigarren zatia
Aldageletatik bueltako 2-3ko emaitzak kanporaketa irekia zegoela adierazi arren, lehen minutua bete orduko, laugarren gola egin du Lauburuk, eta ia erabakita utzi du lehia.
Ostean, Mondrate ahalegindu da partiduan sartzen berriro ere, eta atezain-jokalaria erabiltzen hasi da erasoan. Baina, ez dio etekinik atera.
Lauburuk beste lau gol egin ditu bigarren zatian, behin betiko 2-8kora heldu arte. Akaso, emaitza zabalegia, bi taldeek egin duten esfortzua aintzat hartuta.