Atzokoa "egun luzea" izan zela adierazi du Arrasate Eskubaloi taldeko Ane Herrerok. Izan ere, infantil mailako nesken partidua 10:00etan hasi zen, eta arratsaldeko 19:30ean jokatu zen senior mailako mutilena. Tartean, beste lau partidu izan zituzten.
Goizean, gaztetxoenak
Goizetako partiduetan, hauek izan ziren emaitzak: Arrasateko infantil neskek Aloñaren kontrako partiduan 11-24 egin zuten; infantil mutilek Aloñaren kontra, 10-21; eta kadete neskak Ordiziren aurka, 13-36.
Hauxe adierazi du Herrerok: "Emaitzak ez ziren onenak izan, baina gustura gaude jende berriak jokatu zituelako partiduak. Infantil mailako jokalari berri dezente dauzkagu eta esan dezakegu proiektu berritxo baten hasieran egon gaitezkeela. Goiz polita pasa genuen".
Arratsaldean, nagusiagoak
Arratsaldeko kadete eta jubenil mailakoen partiduetarako, Herrerok esan du jendea falta zela eta aurredenboraldiko partidu "tipikoak" izan zirela, "ohitzeko partiduak", denboraldia hasi aurretik azken prestaketak egiteko balio izan zutenak.
Kadete mutilek Aloñaren kontrako partiduan, esaterako, 28-23 egin zuten; jubenil neskek Ordiziren kontra, 13-25; eta senior mutilek Gasteizko Gure Auzuneren aurka, 38-20.
Herrerok gaineratu du azken partidu horrek "emozio berezia" izan zuela, Josu Herrero eta Unai Rodriguez jokalari ohiek berriz jantzi zutelako elastikoa.