Urriaren 18an izango da Txikitxu-Arrostaitz dantza taldearen 55-35 urteurreneko ekitaldi nagusia. 250 dantzari elkartuko dira Uarkape pilotalekuan 18:00etatik 20:00etara bitartean; horien artean, gaur egun taldean dauden dantzariak eta dantzari ohiak egongo dira. "Sorpresaz" beteriko ekitaldia izango dela adierazi dute dantza taldetik; esaterako, Arrasateko musikariak eta Arrasateko erraldoi eta kilikien konpartsa egongo dira.
Hainbat ekintza
17:00etan emango diote hasiera ekitaldiari Arizmendiarrieta plazatik Uarkapera abiatuko den kalejirarekin. Ostean, 18:00etan, dantza erakustaldia egongo da Uarkapen. Toki berean, 21:00etan, afaria egingo dute Uarkapen; afal ostean Akorde Music Experience taldearekin dantzaldia egingo dute. Egunarekin bukatzeko, Gaztetxean Altsa Porru erromeriaren eta DJ Astutxuek taldearen emanaldia egongo da, 01:30etik aurrera; sarrera doakoa izango da.
Sarrerak salgai Portaloian
Ekitaldi nagusirako sarrerak doakoak izango dira. Afarirako aldiz, bi aukera egongo dira: umeentzako menua (15 eurotan) eta menu arrunta (28 eurotan). Sarrerak honako egun eta ordu hauetan eskura daitezke Portaloian:
- Irailak 5, 18:00-20:00.
- Irailak 6, 11:30-13:30
- Irailak 11, 18:00-20:00
- Irailak 13, 11:30-13:30