Amarians torneoa antolatu dute Pirolitikek irailaren 20rako

Xabier Urtzelai 2025ko abu. 27a, 12:02

Irailaren 20an antolatuko dute Pirolitikek lehenengo Amarians torneoa, Mojategin.

Azken urte hauetan torneoetan parte hartzen batera eta bestera ibili eta gero, Arrasateko Pirotikak euren torneo propioa antolatzera animatu dira. Hala, irailaren 20an egingo duten Amarians izeneko txapelketan Donostiako Blasfemmes, Valladolideko Vacceas eta Madrilgo Tigresas taldeak batuko dituzte.

Pirolitikek lehenengo Amarians torneoa antolatuko dute irailaren 19tik 21era bitartean –errugbian 20an egingo dute–. "Ez dugu Amarians-a lagunarteko huts batean geratzerik nahi. Gure bailarari 35 urtetik gorakoen amen errugbia zer den erakutsi nahi diogu, merezi dugun ikusgarritasuna eduki eta era berean, torneora etortzen diren guztiek asteburuaren
oroitzapen bikaina eraman dezatela", adierazi dute torneoko antolatzaileek.

Horretarako, lehenengo edizio honetarako Donostiako Blasfemmes, Valladolideko Vacceas eta Madrilgo Tigresas taldeak batuko dituzte. "Urte hauetan jokatu dugun Maters torneoetan geroz eta talde gehiago, pertsona gehiago, lagun gehiago… batu gara. Baina beti izaten dugu sentimendu berezia batzuekin. Horregatik animatu gara gure etxean txapelketa
xume bat antolatzera. Eta nahiz eta lehenengo edizio honetara ezin ditugun nahi genituzkeen guztiak gonbidatu, etorriko direnek bai ala bai egon behar zuten. Hala ere, helburua da edizio gehiago antolatzea, eta torneoak indarra hartzea".

Egubakoitzetik domekara

Talde horiek asteburua egingo dute Arrasaten, nahiz eta torneoa zapatu goizean jokatuko duten (Mojategin, 09:00etan hasita). Hala, egubakoitzean, hilak 19, ARTkoek urtero egiten duten familia argazkian parte hartzera gonbidatuko dituzte Amarianseko taldeak, eta mokadutxoa hartuko dute gero denek elkarrekin. Eta zapatuan, goizean torneoa jokatu ostean 13:00etarako Arrasateko erdigunera joango dira jokalariak, hirugarren denbora hastera, eta 20:00etan egingo dute sari banaketa ekitaldia, Kulturaten.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak