Un clamor bira Galizian hasi eta Iruñean amaituko du Cada Dia en Su Presencia gospel abesbatzak, eta hilabetean zortzi kontzertu eskainiko ditu; horietako bat, Arrasaten. "Eskariak bultzatuta, Gipuzkoan eta Gasteizen bizi diren taldekideek osatutako abesbatzaren euskal atala sortu dugu, eta errepertorioaren zati bat egokitu, euskara eta gaztelania uztartuz. Lurrarekiko maitasun-keinu gisa, irekiera-aurresku bat gehitu dugu", azaldu dute.
Errepertorioari dagokionez, askotariko doinuak plazaratuko dituzte: gospel ereserki tradizionala, aurreskua, jazza, soula eta R&B nota koloretsuak dituen gospel garaikidea. "Aurten, koreografia biziaz gain, taldeak 80ko hamarkadako nostalgikoentzat oso ezaguna den berrikuntza batekin harrituko ditu bertaratuak: Rivers of Babylon", nabarmendu dute.
Aniztasun horrek helburu bakarra dauka, taldekideen esanetan: "Adin eta aurrekontu guztientzako kalitatezko eskaintza kultural batean itxaropen eztanda bat eskaintzea".