Arrasateko Udalak Ferixalekuko eta Altamirako igogailuak ordezkatuko ditu. Dagoeneko argitaratu dute esleipen prozesua, eta lanak kontratua sinatu eta lau hilabeteko epean gauzatzea aurreikusten dute, hau da, udazkenean. "Egungo igogailuak kendu eta segurtasun, irisgarritasun eta erabilerraztasun handiagoa emango duten modelo modernoagoekin ordezkatuko dira", dio Kepa Urteagak, Auzoak eta Obra, Zerbitzu eta Mantentze zinegotziak.
2025eko aurrekontuaren exekuzio aurreikuspen lanen barruan dago bi igogailuen eraberritzea. "Erabilera handiko igogailuak izateaz gain, azken urteetan eraso bandaliko ugari jaso dituzte. Ondorioz, egoera txarrean daude eta matxura ugari dituzte. Aldaketarekin, goiko auzoetako bizilagunen irisgarritasuna eta bizi-kalitatea bermatuko dugu".
Ezaugarri bereziak izango dituzte
Lehiaketara atera dituzten pleguek igogailu berrien ezaugarriak zehazten dituzte, honako hauek, besteak beste: erabat berriak diren bi igogailu moderno instalatuko dituzte; bandalismoaren aurkako babes berezia izango dute; erabilera intentsiborako prestatuta egongo dira; hamahiru lagunentzako edukiera izango dute, eta 1.000 kilora arteko pisua jasateko gaitasuna; irisgarritasuna eta segurtasuna hobetzeko elementu tekniko berritzaileak izango dituzte, hala nola LED argiak, audio bidezko seinaleztapena, braille sistemak, gorabeheren berri emateko sistema automatikoak, eta larrialdietarako une oroko arreta.
Lau hilabeteko lana
Esan moduan, aurreikuspena da lanak udazkenean astea eta, behin hasita, lau hilabete iraun dezake prozesuak, bi igogailuen desmuntatze eta muntatze lanak egiteko. Proiektuaren aurrekontua 176.000 eurokoa da (BEZik gabe), eta enpresek prezio horren azpitik eskaintzak aurkezteko aukera izango dute. "Prezioan sartuta daude igogailu zaharrak desmuntatzea, berriak muntatzea, hauen legalizazioa, mantentze-lanak eta salmenta osteko zerbitzuak", zehaztu dute.