Eguerdian, Itziar Yagüek eta Paul San Martinek Sugar in my Bowl izeneko ikuskizuna eskaini dute. Eguraldiak lagundu du eta ikus-entzuleek oso giro atseginean gozatu dute kontzertuaz.
Arratsaldean, eguraldiaren gorabeherak medio, antolatzaileek Monte tabernaren parean egitekoa zen kontzertua Taupa tabernako arkupetara lekualdatu behar izan dute. Bertan aritu dira, Nico Wayne Toussaint eta Michel Foizon, jendearen oinak dantzan jartzeko asmoz.
Itziar Yagüek, oholtzatik, eskerrak eman dizkie entzuleei eta azpimarratu du horrelako jaialdiek blues musikarentzat duten garrantzia. Nabarmendu du, gainera, Arrasaten jotzea bai beretzat bai bere generorako ohore handia dela.
Arrasate Blues jaialdiaren zazpigarren edizioak ostegunean hasi zuen ibilbidea, jende ugari bilduz. Atzoko arratsaldean ere blues doinuek hartu zituzten hainbat gune: Zigarrola, Taupa taberna eta Aterpe taberna. Hala ere, euriak eraginda, bertan behera geratu zen Irati tabernaren ondoan egitekoa zen Jac Electric taldearen kontzertua.