Amiantoarengatik hildako langile baten emazteari eta semeari 261.304,94 euro ordaindu beharko dizkio Arrasateko Gelma enpresak, Eibarko Lan Arloko Epaitegiaren aginduz, Euskadiko Amiantoaren Biktimen Elkarteak jakinarazi duenez. Haren hitzetan, Elma SA enpresarendako aritu zen lanean 1966tik 1987ra, eta, ondoren, 1987tik 2007ra, Gelmarendako. "Bada, amiantozko plantxak eta labeak zeuden bietan, baina enpresetako batean ere ez zegoen aireztapen-sistemarik edo beharrezko beste segurtasun-neurririk". Hala, Gizarte Segurantzak iaz ondorioztatu zuen gizonezkoari 2009an heriotza eragin zion biriketako kartzinoma lan-jardueraren ondorio zela.
Elkartea "pozik" dago epaiarekin, "prebentziozko arau-hausteak eta biriketako minbizi askok duten lan-jatorria ezkutatzeko saiakerak zapuzten" dituela iritzita, "bereziki fundizioetako langileen artean". Horrenbestez, uste du enpresak eragindako kalteak ordaintzeko unea dela.