Alegiko Intxurre antzerki taldeak antolatuta, Oinarria antzerki topaketa amateurra egin zuten joan den asteburuan. Euskal Herriko hainbat herritako taldeak gonbidatu zituzten; tartean, Arrasateko Doke antzerki taldea. Parte hartzaile guztiek jaso zituzten oroigarriak, eta Dokekoek Zutabea saria jaso zuten Hemen ez du inork ordaintzen laneko"gidoiagatik eta egokitzapen onagatik; baita taldeko adin aniztasunagatik ere". Gainera, taldeko kide Maider Alcelayk dioenez taularatzea ere "positiboki" baloratu zuten ikus-entzuleek, eta "obraren mezu nagusia ondo transmititzeari eta entretenigarria izateari" ere garrantzia handia eman zioten. Hala, "oso gustura" bukatu zuten Doke antzerki taldeko kideek Alegin egindako lanarekin.
Zirkuitu txikien garrantzia
"Oso polita" da, Alcelayren ustetan, beste herri batzuetako antzerki taldeekin elkartu eta norberaren obra gainontzekoen aurrean taularatzea. "Antzerki amateurreko zirkuitu gutxi" daudela dio arrasatearrak, eta halakoetara joateko aukera dagoenean "aprobetxatu" egin behar dela uste du. "Zirkuitu txikiak bizirik mantendu behar dira. Alegikoek adierazi zigutenagatik, jarraipena emateko asmoa dute, eta hori garrantzitsua da", dio arrasatearrak.
Hiru urte daramatzate Dokekoek Alegian taularatu zuten obra lantzen. Bergaran egingo dute azken emanaldia, urriaren 25ean, Seminarixoa aretoan. Emanaldi horrekin bukatutakoan, "beste zerbait lantzeko gogoz" daudela dio Alcelayk, nahiz eta oraindik ez duten ezer erabakita.