Arrasateko Udalak, herriko hainbat eragilerekin elkarlanean, sexu- eta genero-aniztasuna erdigunean jarriz egindako diagnostikoaren eta ekintza planaren lehen emaitzak aurkeztuko ditu egubakoitzean.
84 herritarrek parte hartu duten prozesu parte-hartzailearen bidez, kolektiboaren egunerokotasuneko esparruak jorratu dituzte: espazio publikoa, segurtasuna, sexilioa, familia, lana, aisialdia, osasuna, kirola, eskola, kuadrilla eta militantzia, besteak beste.
Arrasateko LGTBIQ+ kolektiboarentzako mugarri izan nahi du aurkezpenak eta, beraz, Udalaren helburua da ekitaldi hori abiapuntu bilakatzea, "Arrasate denontzat —eta bereziki LGTBIQ+ pertsonentzat— bizigarriagoa, seguruagoa eta inklusiboagoa izateko eta horretarako proposamen eta aldarrikapenak plazaratzeko".
Ekitaldia irekia izango da herritar guztientzat, eta gonbidapen berezia egin diete LGTBIQ+ kolektiboko kideei, komunitateari eta herritar guztiei: "Elkarrekin idatz dezagun gure memoria eta etorkizun kolektiboa. Gure iraganeko gu bakoitzari zor diogu etorkizun hobe bat eta orainaldi bizigarriago bat", adierazi dute.
