Aitzina pika ikuskizuna sortu zuen Aitzindariak elkarteak 2007an, belaunaldi askotariko berrogeita hamar lagunekin, Zuberoako dantzak, antzezlana eta kantuak oinarri hartuta. Bide beretik sortu dute Aitzina biga, 104 partaidez osatutakoa eta askotariko diziplinak batuta lurraldearen kulturaren erakusle. "Gogotsu" daude bihar, zapatua, 19:00etan hasita, Amaia antzokian erakusteko; eta sarreren salmentak izan duen harrera ona ikusita, ikusmina sortu du Debagoieneko kulturazaleen artean. Oraindik ere badira batzuk eskuragarri, 15 eurotan, Arrasate.eus atarian.
Hiru gai nagusitan banatzen da ikuskizuna: desafioa, transmisioa eta harremanak. Era berean, ikuskizunaren bitartez, harremanak sortu gura dituzte Euskal Herriko gainontzeko lurraldeekin.