Garagartza "bizirik" dagoela aldarrikatu gura dute ekimenaren bitartez. "Eta, bide batez, arrasatearrei aukera eman gura diegu Garagartza hobeto ezagutzeko. Izan ere, uste dugu askorentzat ezezaguna dela oraindik, azaldu du Aitor Urizar Mutxin-ek, antolatzaileetako batek. "Udaberri aldera kontzertu bat egitea izan zen lehen ideia eta, horren bueltan, egitaraua osatzen hasi ginen. Azkenerako, askotariko ekintzak prestatu ditugu. Ortuak, kobak, iturburuak, sendabelarrak…gai askoren inguruan ikasteko aukera egongo da", nabarmendu du.
Hori guztia jai giroan egin gura dute eta, modu horretan, kontzertuak eta umeendako jolasak ere egongo dira, baita bazkaria ere. Azken horretarako, azaldu dutenez, gomendagarria da aurrez izena ematea, 620 15 05 87 telefono zenbakira deituta, "jende kopurua kalkulatu ahal izateko".
Udalaren eta Besaide Mendizale Elkartearen laguntzarekin osatu dute egitaraua.
