Eraikinaren izaera berreskuratzeari garrantzia eman dio Maider Morras Arrasateko alkateak. "Uste dugu industria ondareari ekarpen handia egingo diola jatorrizko izena berreskuratzeak, izan ere, fabrika horrek erabat baldintzatu zuen Arrasateko egunerokoa. Ehunka herritarrek egiten zuten bertan lan, eta Arrasate 'herri sarrailagile' bezala ezagutzera eman zen", azaldu du.
Berbak eraikineko fatxadan jartzea "aspaldiko eskakizuna" dela adierazi du Arrasate Zientzia Elkarteko Jabier Bengoak. "Duela hiruzpalau agintaldi egin genuen eskaera lehen aldiz, eta urtero eskatu izan dugu orain arte. Azkenean, onartu digute. Ez gaitezen ahaztu garai batean zer izan zen eraikin hau", dio.
Lantegiaren izena berreskuratzeaz gain, jatorrizko sirena ere entzun ahal izango da Maiatzaren 1ean, Langileen Nazioarteko Egunean, 12:00etan, "han sortutako langile klasea eta mugimendu sindikala gogoan izateko", dio Morrasek.
Union Cerrajerako hainbat eraikin mantentzen dituzte oraindik: Zerrajerako arkua, garai hartan bulegoak izan zirenak (Mondragon Hotela); lantegia bera (Kulturola), Aprendices ikastetxea izan zena (Juan Artzamendi Musika Etxea), eta etxebizitzak (Etxe Txikiak). "Horrelako oso adibide gutxi aurkitu ditzakegu hemen inguruan", azpimarratu du.
Ondarearekiko "konpromiso osoa"
Udal Gobernuak ondare industrial eta historikoarekiko "konpromiso osoa" erakutsi du, agintaldi honetan gauzatutako ekintzak nabarmenduz: "Markuleteko labea berreskuratu eta hori birgaitzeko azterlana egin dugu; Zerrajerako arkuan mantentze eta eraberritze lanak egin ditugu; Arrasate 360º bisita birtuala garatu dugu; Etxe Txikietan plaka oroigarria jarri dugu, AZEren eskariz; eta orain Union Cerrajera berbak jarri ditugu Kulturolan". Horrez gain, Portaloiko eta Iturriotzeko ateak eraberritzeko proiektuak ere martxan dituzte.