Julen Arriolabengoak (Eskoriatza, 2001) debuta egingo du etxeko lasterketan, astelehenean Gasteizko erlojupekoarekin hasiko duten Euskal Herriko Itzulian. Hain zuzen, eskaera hori egin zien taldeko zuzendariei urteko egutegia zehazten hasi zirenean, eta zazpikoan sartu dute eskoriatzarra. "Ametsa da; txirrindularitzarekin ditudan lehenengo oroitzapenek Eskoriatzako saihesbidera eramaten naute, umea nintzela Itzulia herritik zelan pasatzen zen ikustera joaten ginenekoa". Eskoriatzatik ez, baina laugarren etapan ziklistak Oñatitik pasako dira, eta Asentzio igoko dute gero. Eta seigarren etapan Elgetatik eta Bergaratik pasako da tropela.
Jakinda zuen taldearendako zein garrantzitsua den Itzulia, garesti egongo zen zazpikoan sartzea...
Urteko lasterketa garrantzitsuena da guretako, eta bai, bertan profesional moduan parte hartu ahal izatea aspalditik daukadan ametsa da, nire kirol bizitzan bete nahi nuen ilusioetako bat da. Egia da gauza bat dela taldeari eskaera egitea, eskaera bakar hori egin nien, eta beste bat taldeak eskakizuna onartzea. Jaengo klasikoan –otsail erdian– ihes eginda ibili nintzen, eta podiumeko postuetan helmugaratzeko borrokan, eta lasterketa hartan egindako lana klabea izan zen taldeak nire eskaera aintzat har zezan. Gainera, ondo prestatu ahal izan dut astelehenean hasiko dugun lasterketa.
Zelakoak izan dira azken asteak?
Hiru aste egin ditut Sierra Nevadan, garaieran entrenatzen. Horretara bideratutako zentro bat dago han, eta kirolari asko batzen dira bertan, modalitate askotarikoak. Lan ona egiten da han, ez dagoelako distrakziorik, eta dena oso zainduta izaten dugu. Gure taldeko lau ziklista izan gara han Eta azken astea etxean egin dut, Eskoriatzan; denbora apur bat behar izaten da garaierako entrenamenduak egin ostean ostera ere sentsazio onak errekuperatzeko.
Zelako Itzulia aurreikusten duzu?
Diotenez, azken urteotako gogorrena izan daiteke, eta etapetako profilei begiratzea baino ez dago. Eta badira beste etapa batzuk arriskutsuak izan daitezkeenak. Esaterako, badirudi bigarren etapan [Iruñea-Lodosa] ez dagoela apartekorik, baina haizea biltzen bada... oso gogorra izan daiteke.
Zein asmorekin joango da Team Caja Rural? Izan ere, ez dakit sailkapen orokorrak zentzu handirik duen zuendako...
Taldetik eskatu digute etapetan protagonista izaten saiatzeko, ihesaldietan sartu, mendiko sariagatik lehiatu... Esprintetarako Thomas Silva dugu, baina etapa bakarra da harendako modukoa. Sailkapen orokorreko lehian talde indartsuak izango dira, puntako ziklistekin, eta hor ibiltzea zaila da, bai. Niri askatasuna eman didate; ea lan txukuna egin dezakegun.
Komeni da egin beharreko lanak azken etaparen aurretik egitea, ala?
Hain justu, gaur goizean [Eguaztena] ibili naiz azken etapako mendate batzuk ikuskatzen: Krabelin... Etapa oso gogorra da, menditsua, eta azken etapa horretan oso aukera gutxi egoten da, sailkapen orokorrean lehia estua badago talde indartsu guztiak topera joaten direlako. Etapa hasieran ihesaldian sartuta ere posible da lehenengo mendatea iristeaz batera tropelak irenstea, taldeek kontrolpean mantendu nahi izaten dutelako etapa.
Etaparen bat gorriz markatuta?
Gu ez gaude aukeratzeko moduan [Barre], etengabe saiatu beharko dugu eta zorte apur bat aldeko izan.
