Ez nekien Gallagher eta Gallacher bi abizen ezberdin zirenik; badu istoriorik?
Bi abizen ezberdin dira, bai. Nire abizena Gallacher da, eta jatorri irlandarra dauka, nahiz eta ni, jaiotzez, Eskoziakoa naizen.
Irati tabernan egiten duzu lan; ostalaritza ikasketak dituzu?
Ez dut ikasi ostalaritzarekin zerikusia duen ezer. Bere garaian, menpekotasun egoeran dauden pertsonen zaintzan oinarritutako ikasketak egin nituen, baina, praktikaldia hasi nuenean, lan latza iruditu zitzaidan; ordurako tabernan lanean ari nintzen, eta erabaki nuen hobe nuela bertan lanean jarraitu, nik ikasitakoan ibiltzea baino.
Iratiko zer pintxo jango zenuke egunero?
Askotariko pintxoak egoten dira, hori egia da. Guztiek izaten dute oso itxura ona, baina bat eta bakarra aukeratu beharko banu, entsaladilla errusiar pintxoa aukeratuko nukeela uste dut.
Zein da barra barruan lanean entzun duzun zurrumurru arraroena?
Egia da askotan esaten dela zerbitzariok guztiaz konturatzen garela eta barraz beste aldera dauden konbertsazio guztiak entzuten ditugula. Hala ere, hori ez da nire kasua; saiatzen naiz zurrumurru horiek ez entzuten eta jendearen konbertsazioetan ez sartzen. Hortaz, ez nuke jakingo zer erantzun galdera horri.
Zer txandatan nahiago duzu lan egin?
Bada, txanda bat aukeratzekotan, uste dut goizez lan egitea gustatzen zaidala gehien; batez ere, arratsaldeak libre izaten ditudalako. Edozelan ere, txanda guztietan lan egitea tokatzen zait.
Gaztetan patinetan ibiltzen zinen; takateko bat baino gehiago hartu dituzu? Gaur egun ere ibiltzen zara?
Takateko ederrak hartutakoa naiz, bai; kar-kar. Denak oso mingarriak, gainera. Gaur egun ez naiz ibiltzen patinetan, baina gazteagoa nintzenean asko ibiltzen nintzen.
Barra barruan ez zaudenean, musika da zure zaletasuna?
Arlo askotan gustatzen zait; esaterako, kontzertuak ikustea edo musika etxean entzutea edo sortzea. Ez dut ezer argitaratu oraindik, baina, agian, aurrerago egingo dut; badut gogoa.
Itzuliko zinateke Eskoziara?
Bada buruan dudan zerbait, eta bai, gustatuko litzaidake egunen batean Eskoziara itzultzea. Oraindik ez da guztiz ziurra, baina batek daki...
MOTZEAN
Bidaiatzeko toki bat? Grezia.
Janari gorrotatuena? Alkatxofak.
Abesti bat? The Verve taldearen Bitter Sweet Symphony.
Deserturako gauza bat? Bakarra aukeratzekotan, ura.
Bailarako festa bat? Arrasateko sanjuanak.
Arrasateko toki bat? Monterron.
