Oholtza eta "saltsa" askotan ibilitakoa da Belen Nevado artista gasteiztarra eta Arrasaten ere hainbat ikuskizun taularatu ditu: Las punkis también lloran, Jhony & Jane, Ovarios verdes fritos eta Sofocos, besteak beste. Halaber, hainbat antzerki konpainiatan egin izan du lan eta musika munduan ere aritu izan da, La Xeta Paxote eta Carrocerias Betoño taldeetan, nagusiki.
Beste esparru batean, formatzaile lanak ere egin izan ditu Emakume Txokoko Jabetze Eskolan eman dituen hainbat tailerretan: kabareta, inprobisazioa, testuen interpretazioa, zapalduaren antzerkia, klowna eta abar. "Espazio horiekin eta lan kolektibo eta eraldatzailearekin duen inplikazioa eta konpromisoa da bere nortasun ezaugarrietako bat", azaldu dute Emakume Txokoko ordezkariek.
Haren lanaren ezaugarrietako batzuk dira sormena, pasioa, umorea, ikuspegi feminista eta transgresioa, besteak beste; antzerki munduan, musika arloan zein Jabetze Eskoletan. "Helburu argi batek zeharkatzen baitu bere biografia osoa: antzerkia, artea, sormena emakumeen ahalduntzerako prozesuak sustatzeko eta eraldaketarako tresna bezala lantzea".
Beatriz Egizabalek gidatuta
Beatriz Egizabalek gidatuko du saioa. Hura ere ezaguna da ipuin kontalari, bakarrizketari eta inprobisatzaile arloan. "Umorea eta konplizitatea, tarteko, saio polita egingo dute elkarrekin eta izango da barre egiteko, hunkitzeko, hausnarketa feministarako eta bi artista handi horietaz gozatzeko aukera", diote.
