Errenta aitorpena euskaraz egiteko kanpaina abiatu du aurten ere Arrasateko Udalak. Gipuzkoako Foru Aldundiaren datuen arabera, 2023ko errenta aitorpena arrasatearren %22k egin zuen euskaraz. Hala, 2006tik hamasei puntu egin ditu gora errenta aitorpena euskaraz egin duten herritarren kopuruak. "Euskarari bide berriak irekitzeaz gain, administrazioaren euskalduntzea ere bultzatzen da horrela".
Errenta aitorpena egiteko hiru moduetan erabili daiteke euskara: autolikidazio proposamena, mekanizatua eta Internet bidezkoa. Gaurtik ekainaren 30era aurkeztu beharko dira aitorpenak eta hitzordua eskatzeko, kontsultak egiteko eta argibideetarako, honako bide hauek erabili daitezke: 943 11 30 00 telefono zenbakia, Bergarako Ogasuneko Bulegoa (Toki Eder 5) eta Gipuzkoa.eus ataria.
