Debagoieneko lanbide heziketako zazpi ikastetxeak ezagutzeko aukera izango da apirileko lehen egunetan Arrasaten, Lanbide Heziketako Azoka egingo baitute, Goiaz izenpean. Hain zuzen, han izango dira Aretxabaleta Lanbide Eskola, Arizmendi ikastola, Mariaren Lagundia, Miguel Altuna Lanbide Heziketa, Mondragon Goi Eskola Politeknikoa, Oñati Gestio Heziketa eta Oñati BHI. Era berean, informazio mahaiak jarriko dituzte Bastida Akademiak, IkasDebagoienak, Lanekik eta Debagoieneko Mankomunitateak.
08:30etik 14:30era egongo da zabalik azoka bi egunetan, baina apirilaren 1ean arratsaldez bisitatzeko aukera ere izango da, 16:00etatik 18:30era. Antolatzaileen hitzetan, ikasle, langabe eta prestakuntza bila dabilen edonorrendako dago zabalik.
Bi hitzaldi
Egun bakoitzean hitzaldi bana antolatu dute: lehena, Lanbide heziketa berria. Nik ere LH aukeratu dut izenpean egingo da, 18:30ean, eta gurasoei eta lanbide heziketa ikasteko interesa dutenei zuzenduta dago, lanbide heziketaren antolaketa, abantailak eta berrikuntzak azalduko baitituzte; bigarrena, Lan esperientziak akreditatzeko baliabideak izenpean egingo da apirilaren 2an, 12:00etan, eta "hitzaldi honetan pertsonek lanaren bitartez garatu dituzten konpetentziak akreditatzeko dauden baliabideak eta eman beharreko pausoak zeintzuk diren ezagutuko dituzte".
Kulturateko areto nagusian izango dira bi hitzaldiak, eta aurrez izena ematea komenigarria dela azaldu dute antolatzaileek: 943 79 30 90 edo debagoiena.goiaz@gmail.com.
