Goizaldean bota duen euri zaparradak inguruak lokaztu baditu ere zuhaitzak landatzeko helburuarekin familiak Tellerixagainera iritsi direnean ateri zen oraindik, nahiz eta haizea zebilen. Eta, euria iritsi bitartean lanean ibili dira bertaratutako gazte eta helduak, aurretik Landa Inguruneko teknikari Pello Garaik emandako azalpenak entzun eta gero. Bada, gaur landatu dituzten landareen artean bereziki haritzak landatu dituzte, baina baita bete hosto-zabal batzuk ere: gorostiak, haltzak, urkiak, lizarrak, artea, astigar zuria eta basagurbea. "Beste urte batzuetan baino jende gutxiago batu gara gaur eta helburua ez da ekarri ditugun landare guztiak gaur landatzea, eguraldiak ere ez du askorik laguntzen eta familiek landatzen ez dituzten landareak landatuko ditugu guk aurrerago. Helburua gehiago da goiz pasa polit bat egitea, inguruak erakustea eta landare batzuk landatzea eta ondoren elkarrekin hamaiketakoa egitea".
Hala, Garaik azaldu du Arrasateko Udalak 2019. urtean erosi zuela lursail horiek, lehen zatirik handiena pinudia izandakoa, eta auzolanen ondorioz, 2,2 hektareako eremua birlandatzea lortu dutela.
