Landaola Sariak banatu dituzte gaur, martxoak 14, Zumarragan, eta Bedoñako Errastiko Eskolak eskuratu du Erakunde Pribatuaren alorrekoa. Naiara Uriarte eta Xabi Abasolo dira proiektuaren atzean dauden herritarrak, eta lehen sektorea zein landa eremua ezagutzea eta sustatzea helburu duen hezkuntza-proiektua abiatu zuten iazko irailean. Nabarmendu dutenez, "ikasleek naturarekin harreman zuzena" izanik, jasangarritasuna eta bioaniztasuna lantzen dituzte, besteak beste, "modu praktiko eta ludikoan". Euren jarduera nagusietako bat, hala ere, Errastiko okindegia da, ogi eta gozo ekologikoak egiten baitituzte.
Oñatiko Udala ere Landaola Saria eskuratzeko hautagaien artean zegoen, Erakunde Publikoaren alorrean, herriko erreken, basoen, mendien, etxeen eta hainbat tokiren izenak biltzen dituen mapa interaktibo digitalarengatik. Hala ere, azkenean, ez du saririk eskuratu, Legazpiko Udalarendako izan baita. Horrez gain, Josebe Lizeaga Lujanbiok eskuratu du Emakumeak Landa Eremuan Saria eta Manuel Odria Ibargurenek, berriz, Urteetako Ibilbideari Saria.
