EAJ-PNV Arrasatek azaldu duenez, Udal Gobernuari "ikerketa sakon" bat egiteko eskaera egin zioten duela urtebete, "edukiontzien kokapena ebaluatzeko eta horrelako gertaeren arriskuak minimizatzeko" helburuarekin. "Hala ere, zenbait gune lekuz aldatu diren arren, hartutako neurriak oraindik ere ez dira nahikoak. Edukiontziak leku seguruagoetan kokatzeko eta sute berrien aukera ahalik eta gehien murrizteko azterketa sakona egitea ezinbestekoa dela azpimarratzen dugu", adierazi du Ander Garay bozeramaileak.
Era berean, edukiontziak suaren aurkako materialekin egitea eta horietan su-itzalgailuak eta su-detektagailuak jartzea eskatu dute berriro, "Getxon arrakastaz ezarri den moduan". Prebentzio neurri horiek "berehala" hartzeko eskatu diete jeltzaleek EH Bilduri eta Elkarrekin Arrasateri, "arazo hau serio hartuz eta berehala konponbide eraginkorrak ezarriz".