Emakumeen txokotik adierazi dute ekimenen helburua dela "emakume sortzaileei leku bat eskaintzea"; horregatik, Mirentxu Loyarte zinema zuzendari iruindarraren bi film labur aukeratu dituzte: Irrintzi eta Euskal emakumeak lanak, hain justu, eta solasaldia gidatzeko ardura izango du Arantza Santesteban historialariak. Kultur arloko langilea, ikerlaria eta zinegilea da Santesteban, eta Emakumeen Txokotik adierazi dute "zinegileen genealogia feminista ariketa bat egin eta Mirentxu Loyarteren lana ezagutzeko eta berrikusteko aukera" egongo dela zine saioan, iruindarraren eskutik. "Luxu bat da Santesteban gurean izatea, eta haren begirada, ezagutza eta egin ditzazkeen hausnarketak aprobetxatuko ditugu Mirentxu Loyarteren lanera hurbiltzeko, zineaz aritzeko eta gozatzeko", gaineratu dute.
Sarrera doakoa
Film laburrak ikusteko eta solasaldira bertaratzeko ez da sarrerarik ordaindu beharko. Emakumeen Txokotik diote "herritarrek ikuspegi feminista batetik hausnartzeko" antolatzen dituztela halako ekimenak, eta hortaz, "arrasatearrei emanaldira gerturatzeko gonbita" luzatu die.
