Mondragon Unibertsitateko laborategiak bertatik bertara ezagutzeko aukera izan dute egunotan DBH Derrigorrezko Bigarren Hezkuntzako, batxilergoko eta lanbide heziketako ikasleek, hor dihardutenek bertatik bertara ezagutu ditzaten "zientziaren eta teknologiaren arloetan jardunean dabiltzan eta erreferentziazkoak diren emakumeen testigantzak eta gogoetak". Hala, dozenaka ikasle izan dira Goi Eskola Politeknikoaren Arrasateko campusean aste honetan.
Ikasleek hiru laborategi bisitatu dituzte; lehena, prototipoena: "3D marrazketako, 3D inprimaketako eta laser-ebaketako tresnak erabiltzeko, hainbat sektoretarako baliagarriak direnak eta prototipoak sortzeko aukera ematen dutenak". Bigarren laborategian, berriz, parte-hartzaileek aurrez aurre ikusi dute nola ikertzen diren materialen propietateak, mikroskopio, trakzio-saiakuntza, gogortasun saiakuntza eta abarren bidez. Eta azkenik, hirugarrengoan, biomedikuntzaz jardun dute, erabiltzen dituzten teknologiak eta ikerketa-praktikak ezagutuz.
