Puntua aldizkariko bi azalek European Newspaper Award sarietako sari nagusia eskuratu dute toki komunikabideen azalen kategorian. "Europako diseinu lehiaketa handiena da; herrialde guztietako komunikabide handienek ere hartzen dute parte", dio Iñaki Iturbek, Goienako diseinu-arduradunak.
Saritutako azalak 403. eta 412. zenbakietakoak dira, iaz argitaratutakoak: bata Martxoaren 8an argitaratu zen, eta Emakumeen Nazioarteko Egunaren harira egindako lantegietako berdintasun planen erreportajea irudikatzeko egindakoa da; bestea, berriz, maiatzaren 24an argitaratu zuten, eta azal hartan ere barruan landutako erreportajea ekarri zuten azalera. Hain zuzen, biniloak zituen hizpide, eta euskarri hori maite duten bost debagoiendar elkarrizketatu zituzten. Hortik sortu zen Biniloak; bueltaka jarraitzen duen pasioa azala.
