Otsailaren 17tik 21era, Euskal Herrian mugarri izan diren data, pertsonaia eta gertaera garrantzitsuz jantzita egongo da Kulturateko Loramendi gela. Nabarralde eta Zuztarrak Errotuz elkarteek osatu dute Habitat. Ezkutatu diguten historia izeneko erakusketa, Arrasateko Udalaren laguntzarekin. DBH-ko 4. mailako ikasleei zuzenduta dago eta euskaldunen habitata, lurraldetasuna eta historiaren gako nagusienak adierazten ditu, "modu grafiko argi eta atseginean", hamalau panelen bitartez.
Hala, edukiak azaltzeko ordubeteko bisita didaktikoak eskainiko dizkie bederatzi talderi Nabarraldeko partaide Beñi Agirrek. Bukatu ondoren, ikastetxeetako ikasle eta irakasleei balorazio bat eskatuko diete, eta, positiboa izanez gero, ikastetxeen adostasunarekin datorren urtean jarraipena emango liokete egitasmoari.
