Sententzia "euskarafobo eta atzerakoiak" salatu dituzte elkarretaratzean eta hau adierazi dute: "Euskararen kontrako sententzien kateak ez du etenik. Donostiako Udalaren hizkuntza politika deuseztatu gura duen erabaki judiziala dugu azkena. Sententzia horren arabera, Udalari dagokio udaltzain gisa aritzeko B2 hizkuntza maila erabat nahitaezkoa dela frogatzea". Eta horren aurrean galdera hauek iradoki dituzte: "Euskara nahitaezkoa dela frogatu behar dugu? Ez al dira nahikoa herri eta herritar euskaldun gisa ditugun eskubideak? Ez al da nahikoa udalek euren hizkuntza politikak erabaki eta egikaritzeko dituzten eskubidea eta eskumena?".
Salatu dute, Donostiako udalak ez ezik, Astigarragakoak eta Usurbilgoak ere jaso dutela helegite bana, udaltzain berriak aukeratzeko egin dituzten azken deialdien kontra. Gaineratu dute, bi kasu horietan, epaileek "gehiegizkotzat" jo dutela haien hizkuntza eskakizuna eta hiru sententzia horiek "oso larriak" direla: "Udaltzainek herritarrekin harreman zuzena dutelako eta euren lanpostuak herritarren segurtasunari lotuta daudelako".
Beste hau ere salatu dute: "Gogor salatu behar da botere judizialaren injerentzia, udalen eskumena delako langile publikoei dagokien hizkuntza eskakizuna zehaztea, hizkuntza eskubideak bermatzeko beharrezkoak diren hizkuntza politikak erabakitzea eta aurrera eramatea".
Horregatik guztiagatik, aldarrikatu dute "gure eskubideak egiazki bermatuko dituen arkitektura juridiko berri bat".
