2025a ere "ekimenez beteta" datorrela azaldu dute Ttakuneko kideek. "Hainbat ikastaro antolatzeko asmoa dugu eta, urtea ongi hasteko, jai giroan batu gura ditugu arrasatearrak eta ingurukoak, txalapartaren inguruan", azaldu dute. Horretarako baliatuko dute, hain zuzen, Txotxparta Eguna.
Arrasateko Ttakun Txalaparta Elkarteak 32 urte beteko ditu aurten eta "inoiz baino kide gehiago" ditu taldean. "Gaur egun 30 ttakunkidek osatzen dute taldea eta azken urteetan hazkunde handia izan du", diote.
Lekukoa emanez eginiko ibilbide bat da Ttakunena, "modu naturalean" buruturiko ariketa, "32 urteko iraupen eta garapenaren giltza", azaldu dutenez. "Aurrera begira, hori izango da erronka nagusia, belaunaldi berriei erakutsi eta Euskal Herriko altxorra dugun txalapartaz gozatuko duten belaunaldi gazteak erakartzea, txalaparta beraiena eginez eta beraien bide propioetatik landu dezaten".
