Proposamen bereziki ezberdina dakar Kooltur Ostegunak ekimenak otsailaren 13rako; gaztetxean, 22:00etan; sarreraren prezioa, zazpi euro. Eider Adeletxek eta Ane Zubeldiak osatzen duten Mejillon Tigre kolektiboa gonbidatu dute, Hitz esana emanaldia egin dezan. Eider Perez eta Ane Garcia izenez ere ezagutuko dituzte askok; bi sortzaileek, euren literatur lanak argitaratzeko, amamen abizenak baliatzen dituzte.
'Spoken word' formatua
Sormen-lanak kolektibotasunetik landu eta plazaratzeko asmoz sortu dute Mejillon Tigre, baina aurretik ere elkarrekin jardunak ziren. 2016tik 2019ra, Autobiographikal emanaldiarekin aritu ziren, munduko emakume poeten lanak euskaraz errezitatu eta antzezten.
Orain esku artean duten Hitz esana ere poesia da, spoken word formatua darabilena. Honela azaldu dute bi sortzaileek: "Spoken word delakoa, batez ere, ingeles hiztunak diren herrialdeetan landutako poesia-molde konkretu bat da: ahoz gora esateko idatzitako poesia; errepikari, erritmoari eta hitzen soinuari arreta berezia ematen dion poesia; entzulearekin zuzen-zuzenean komunikatu nahi duen poesia; gorputzaz ahazten ez den poesia; esan egiten den poesia; momentuan gertatzen den poesia".
Kooltur Ostegunetan kontzertuak badira ere ekitaldi ohikoenak, oraingoan poesia izango da protagonista; betiere, musikaz lagunduta. Bi sortzaileak zeharkatzen dituzten bizipenak dira aurkeztu dituzten testuen oinarri: etxebizitza, sexu-indarkeria, gorpuztasuna, idoloak eta erreferenteak, besteak beste.
