Mondragon Unibertsitateak martxan du Emakumeak Zientzian ekimena, "emakumezko ikasle gazteek zientziaren eta teknologiaren alorretako erreferentziazko emakumeen berri" izan dezaten, eta bertatik bertara entzun ditzaten haien testigantzak eta gogoetak. Horretarako, bisitak antolatu dituzte laborategietara, eta hilaren 10ean, astelehenean, izango da Arrasatekoa, 10:00etatik 12:00etara bitartean.
Prototipoen laborategia bisitatuko dute lehendabizi ikasleek, eta zertarako aukera izango duten azaldu dute antolatzaileek: "3D marrazketako, 3D inprimaketako eta laser-ebaketako tresnak erabiltzeko, hainbat sektoretarako baliagarriak direnak eta prototipoak sortzeko aukera ematen dutenak". Bigarren laborategian, berriz, parte-hartzaileek aurrez aurre ikusiko dute nola ikertzen diren materialen propietateak, mikroskopio, trakzio-saiakuntza, gogortasun-saiakuntza eta abarren bidez. Eta azkenik, hirugarrengoan, biomedikuntzaz jardungo dute, erabiltzen dituzten teknologiak eta ikerketa-praktikak ezagutuz.
