Bihar, urtarrilak 13, hasiko dituzte Uarkapeko boulderra berritzeko lanak, Arrasateko Udalak jakinarazi duenez. Haren hitzetan, "urte askotako mantenu faltaren ondorioz, egoera txarrean eta zaharkitua" dago egun; besteak beste, presa batzuk solte daudela azpimarratu du, beste batzuk puskatuta, eta panelatua ere aldatu beharra dagoela. "Honek segurtasun arazoak sortu ditu azken urteetan, eta erabiltzaileen hainbat kexa ere izan dira".
Lanak, aurreikuspenen arabera, otsailaren 28ra arte luzatuko dira, eta rokodromoa birmoldatzeaz gain, hornitzea eta instalatzea izango da helburua, egungo egitura aprobetxatuz. "Gehiegizko estraplomoak murriztuko dira, modu honetan, gunea eskaladako hastapen, erabiltzaile eta ikastaroetarako egokituko da. Presei dagokienez, instalatutakoek egitura artifizialetarako UNE-EN 12572-3 Europako araua bete beharko dute, eta marka profesional batekoak izango dira". Esku presak, oin presak eta zurezko bolumen berriak jarriko dituzte, besteak beste.
Horretarako, 47.929,31 euroko aurrekontua zehaztu dute BEZa barne, eta Urkizu Agirretxe Ioseba eta Beste Bat O.E enpresek egingo dituzte lanak.