Eguerdiko hamabietan hasi da ART eta Bilbo Uni taldeen arteko partidua Mojategin, eta indartsu aritu dira lehenengo zatian arrasatearrak, Irene Dolara kapitainaren hitzetan. "Oso zati polita izan da, oso ondo ibili gara, eurei asko kostatu zaie gure zelaira gerturatzea, eta oso ondo mantendu gara bai defentsan bai atakean". Baloiren batzuk ere lapurtu dituztela azaldu du, eta "kontaktuan gogor hasi direnez", bilbotarrek atzera egin dutela.
5-12ko puntuazioarekin amaitu da lehen zatia, eta euren buruarengan "asko sinetsi" dute ARTko jokalariek; bigarren zatian, ordea, "beherantz" egin dute. "Momentu batean nahiko ondo mantendu gara, baina eurek aldaketak zituzten eta guk ez. Hamabi atera gara zelaira, aldaketarik gabe, eta bigarren zatian normalean jokalariok nekatuta egoten gara; gorputzak asko eragiten du buruarengan, eta baita alderantziz ere". Azkenean, 5-44 amaitu da norgehiagoka.
Dolararen hitzetan, Euskal Ligako "talderik indartsuenetakoa" da une honetan bilbotarrena, eta partidua, horrenbestez, "espero baino hobeto" joan da: "Sentsazio onarekin atera gara partidutik, batik bat lehen zatiarekin gelditu baikara: sekulako partidua egin dugu lehen minutu horietan, gustura gaude orokorrean".
