Bizarrak eta kapak dantzan dituztela heldu dira Errege Magoak Debagoienera

Oihana Elorza Gorostiza 2025ko urt. 5a, 21:03

Haizeak bizarrak eta kapak dantzan jarrita heldu dira Errege Magoak Debagoienera. Egin dituzte desfileak eta hartu dute tartea umeekin egoteko. Arrasaten, maitasuna eta bakea eskatu dute.

Aurten ere etorri dira Errege Magoak Debagoienera. Ohiko ibilbideak egin dituzte herrietan eta hartu dute tartea umeak altzoan edo ondoan hartu eta eurekin egoteko. Eskutitza eskura eman diete batek baino gehiagok eta ia ahopeka esan, beste batzuk, euren desioak zeintzuk diren. Arrasateko desfilea, esaterako, plazan bukatu dute beste behin eta umeekin egon aurretik, maitasuna eta bakea eskatu dute; baita bakearen aldeko isilunea egitea ere.