Urteroko gisan, Arrasate Euskaldun Dezagun (AED) elkarteak bertso saioa antolatu zuen Santamas bezperan. Puntako bertsolariak izan ziren oholtza gainean, tartean bi debagoiendar, Ane Zuazubiskar arrasatearra eta Aitor Tatiegi oñatiarra. Hauekin batera 2024ko Gipuzkoako Bertsolari Txapelketako txapeldun den Alaia Martin eta Andoni Egaña izan ziren kantuan. Gai jartzailea ere debagoiendarra izan zen, Olatz Zuazubiskar arrasatearra.
Urteroko bertso saioak izan zuen berritasun bat: kokapena. Lehenengoz Juan Arzamendi Musika Etxean (JAME) izan zen bertso jaialdia eta bertsolariek ez zuten honi aipamena egiteko aukerarik galdu. "Bertso saio bat lehenengo aldiz / gaur gure areto hontan" kantatu zuen Zuazubiskarrek, "Musika eskolan belarri txarra / neretzat sarri sol la da / bertsolaritza bapatean da / nobatoak denok gara / hargatik nator garai bateko / aprendizen eskolara" jarraitu zuen Egañak.
Sarrera guztiak salduta, goraino bete zen JAMEko auditorioa.
