Santamasetako egitarauaren barruan, artzai txakur lehiaketa egin dute gaur, zapatua, Kondekuako zelaian. Estepan Plazaolak aurkeztu du erakustaldia, eta Jose Ramon Garcia artzaiak gidatu du. Garciaren As, Lia eta Bitu, Mikel Calderonen Sua, Esther Caminoren Yako eta Juan Carlos Alonsoren Bizkor txakurrek hartu dute parte bertan.
Txakur beteranoak eta hezten dabiltzan txakurrak uztartuta jardun dira. Txapelketetan ibiltzen diren txakur beteranoek beraien abilezia erakutsi dute proba ezberdinen bitartez. Gazteenek berriz hezte prozesuan ikasitako guztia jarri dute praktikan, hauetako batzuentzat jendaurrean jartzen ziren lehen aldia zelarik. Txakur gazteen presentzia aprobetxatuta, hauek hezteko erabiltzen dituzten teknikak ere azaldu dizkiete bertaratu diren herritarrei.
