Santamas kroserako Arrasate Atletiko Taldeko lagunek korrikalari arrasatearrei bakarrik ez, Debagoieneko kuadrillei ere egin diete dei; izan ere, herri mailako kros hori bailarara zabaltzen dabiltza, eta geroago eta lagun gehiago etortzen dira Oñatitik eta Bergaratik, herri bi aipatzearren. Iaz, 238 korrikalari batu ziren irteera puntuan (12:30, Garibai etorbidea), eta azkarrenak Unai Ibarra (18.09.06) eta Ainara Urrutia (21.56.94) izan ziren. Segidan, gizonezkoetan bigarren postuan, Iñigo Alzola helmugaratu zen, eta hirugarrena Endika Donnay izan zen. Emakumezkoetan, berriz, bigarrena Ane Zabala arrasatearra izan zen eta hirugarrena, berriz, Izaro Llodio.
Ohi moduan, lasterketak sei kilometro izango ditu eta kuadrilla bakoitzeko lau ordezkari onenen sailkapena hartuko dute kontuan irabazleak erabakitzeko –bakarkako sariak ere egongo dira–. Hala, kuadrilla azkarrenak bildots bat jasoko du, bigarren onenarendako lau untxi izango dira eta hirugarren sailkatzen direnek bost oilasko eramango dituzte etxera.
Maria San Joseri laguntzeko
Izen-ematea domekan bertan egin ahal izango da, Biterin bertan egongo den postuan –11:00etatik 12:00etara gaztetxoendako lasterketak egingo dituzte–. Eta antolatzaileek izen-emate bakoitzeko euro bat bideratuko dute 3 urteko Mara San Joseri laguntzeko. Neskatilak Batten izeneko gaixotasun arraroa du, eta, gaixotasun neurodegeneratiboa izanda, garaiz ekin behar diote osatzeari; baina, gaur-gaurkoz, ez dago sendakuntzarik, eta probako tratamenduetan dute arreta jarrita etxekoek. Itsulapikoak ere jarriko dituzte, dirua eman nahi duenarendako.
