Eguraldiak lagundu ez arren, jaiez gozatzen ari dira Bedoñako auzotarrak eta Begoña Garai auzo-alkateak adierazi duenez, jendea ari da prestatutako ekintzetan parte hartzen. Gainera, belaunaldi ezberdinetako herritarrak direla nabarmendu du, bereziki tortilla eta postre lehiaketetan, eta horrek laguntzen duela "auzoaren kohesiorako".
Garaik gehitu du lehiaketa horietan, mus eta briska txapelketetan, haurren jolasetan eta biharko toka txapelketan banatu dituzten eta banatuko dituzten sari guztiak herriko establezimenduetan erositakoak direla, tokiko merkataritzaren aldeko apustuan.
Bihar, azken eguna izango dute Santa Eulalia jaiek, eta honako ekintza hauek egongo dira: batetik, 11:30etik 12:30era, Thierry Biscary musikari baxenabartarrak a capella emanaldia egingo du elizan; bestetik, 12:30ean, Loramendi elkartean salda beroa eta auzoko ogi, gazta eta txorixo dastaketa egingo dute. Jarraian, toka txapelketa, bi txandatan –16 urtera artekoak eta nagusiak–.
