Hamar urte egin ditu Euskadi Brass taldeak, eta, urteurrena ospatzeko asmoz, 10 urte diskoa ondu du. Alberto Urretxo arrasatearra da, hain zuzen ere, taldearen zuzendari artistikoa. "Diskoa ez da musika bilduma bat soilik: Euskadi Brass taldearen ibilbidea eta euskal musikariaren komunitatean izan duen eragina jasotzen ditu; baita hezkuntza eta proiektu sozial baten oinarria ere, urteetan zehar gazteak, ikasleak eta hezitzaileak inspiratu eta bultzatu dituena". Haren arabera, proiektuak metalezko haize-instrumentuen inguruko "komunitate sendo bat sortzea erdietsi du Euskal Herrian", eta "ezinbesteko ardatz bilakatu dira formakuntza eta transmisioa".
Euskadi Brass taldearen jatorrira joz gero, gainera, Arrasatera jo behar dela azpimarratu du Urretxok, duela 30 urte, 1994an, Arrasate Musikalen sortutako Mondragon Brass taldea baitago oinarrian.
