Osasun arloko hainbat langilek osatzen duten Sanitarioak Palestinarekin taldeak egindako deiari erantzunez, El Volquete, Trumans, The Clayton, Etxepe eta DMT taldeak igo dira gaur arratsalde eta gau partean Arrasateko Monterron parkeko agertokira. Oihu bat Arrasatetik Palestinara izeneko jaialdia izan da horretarako motiboa eta musikaz gain, bestelakorik ere egon da. Izan ere, kontzertu eta kontzertu artean antolatzaileek hitza hartu dute Palestinan bizi duten egoera salatzeko, eta gauza bera egin du bere bertsoekin Andere Arriolabengoa aramaioarrak ere.
"Gure mezua da genozidioaren aurrean ez dugula beste alde batera begiratuko eta isilik ere ez garela geratuko; palestinarrekin gaudela", adierazi du Sanitarioak Palestinarekin taldeko Oihana Plazak eta bertaratu direnen aurrean hitz hartu duenean ere zentzu berean hitz egin du, Palestinako osasun arloko langileek bizi duten egoera azpimarratuz, besteak beste: "Gatazka honen alderdirik mingarrienetako bat mediku-zentroen eta osasun-langileen kontrako eraso sistematikoak dira. Osasun arretaren lehen lerroan daudenak erailtzen ari dira".
Aurreikuspenak gaindituta
“Bagenekien Arrasate herri oso solidarioa dela, baina gure aurreikuspenak gainditu egin dira. 300 edo 400 pertsona inguru etorriko ziren eta oso pozik gaude”, gaineratu du Plazak, eta esan du gaur sarrerekin, barrarekin eta bestelako ekarpenekin batutako dirua UNRWA gobernuz kanpoko erakundearentzat izango dela.
