Valentziara bizitza itzuli kanpaina abiatu dute Arizmendi ikastolako Gaztelupeko ikasleek, hain zuzen ere, DBHko hirugarren mailakoek, Ta zer ez da berdin proiektua dela-eta. Hango herritarrei laguntzea dute helburu, eta, horretarako, hainbat ekintza antolatuko dituzte: "Jendea sentsibilizatzeko eta arazoa hobeto ulertzeko argazki erakusketa bat egingo dugu, kontzientziazio saioak ere prestatu ditugu, informazioa kalean zabaldu...". Horrez gain, Valentziako herritarrei laguntzen dabiltzan eragileen berri emango dute eta, aldi berean, eurek egin duten lana goraipatuko dute.
Diru bilketa izango da, alabaina, ikasleen ekintzen artean protagonistetako bat, hilaren 21ean, bihar, egingo dutena, Biteri plazan eta Herriko Plazan egongo baitira 11:00etatik 13:00etara bitartean txokolate beroa eta bizkotxoa (2,5€), eskumuturrekoak (1€) eta txapak (1€) saltzen.
