Hainbat hilabetez entrenatzen ibili ostean, joan den asteburuan hasi zuen Gipuzkoako Beteranoen Liga Ointxe!-ko Emakume Beteranoen taldeak. Taldea, "aldez aurretik saskibaloian esperientzia duten emakumeentzat ez ezik, kirolean hasi nahi dutenentzat ere" badela adierazi dute klubetik, eta bertan parte hartu nahi dutenei "giro lehiakorra, baina, aldi berean soziala eta lagunkoia" eskaintzen dietela adierazi dute. Astean behin egiten dituzte entrenamendu saioak eta asteburuan partiduak jokatzen dituzte.
Bestalde, 2024ko maiatzean bere ibilbideari ekin dion Ointxapeldunak! talde inklusiboak ere eman dio hasiera denboraldiari. Orain arte talde mistoan aritu
dira entrenatzen, baina, dagoeneko lortu dute emakumezkoen eta gizonezkoen talde bana egitea eta asteburu honetan Gasteizen jokatuko dute biek ala biek, Baskoniaren aurka, 16:30etan eta 18:00etan, Bakh Kiroldegian.
Herritarrei deia
Bi taldeek denboraldia hasi badute ere, klubak deia luzatu die herritarrei, "taldeetan jokatzera batu daitezen". Ointxapeldunak! taldeari dagokionez, gainera, Ointxe!-k jakinarazi du berezi "emakumezkoen beharra" duela taldeak, eta nahiz eta Arrasaten sortutako taldea izan, "bailara osoko jokalariak hartzea" dela euren asmoa. Taldea, "adimen desgaitasuna duten pertsonek, gurasoek, Ointxe!-ko beste jokalariek eta boluntarioek" osatua da.
