EH Bilduren III. Kongresua izango da Otegiren solasaldiaren ardatzetako bat. "Proiektu nazionala da ponentzia politiko honen ardatza, nahia eta xedea. Euskal Herria bere testuinguruan jarri dugu, nazioarteko testuinguruarekin alderatuz, bi estatuen parean nola dagoen jarri dugu eta Euskal Herriaren egoeraren analisia ere egin dugu".
1978an jarri zen eredu autonomikoak porrot egin duela uste du Otegik, edo ez duela irismen estrategikorik. "Euskal Herriak urrats esanguratsu bat egin behar du bere ibilbide nazionalean. Lehen konstatazioa da Euskal Herriak burujabetzaren bidea egin behar duela eta nazio bezala errespetatua izan behar dela. Bigarren konstatazioa da politika neoliberalek porrot egin dutela. Mundu hau bidegabeagoa, ezegonkorragoa, pobreagoa izatera eraman du neoliberalismoak. Arazo estrukturalei ez die irtenbiderik ematen".
